Ագրոարհմիության ՃՀՄ
Հայերեն Русский English

<< Prev 1 2 3 4 5 Next >>

ՀՀ Գյուղատնտեսության Նախարարությունն ու Ագրոարդի ճյուղային հանրապետական միությունը հուշագիր են ստորագրել

ՀՀ գյուղատնտեսության նախարարությունը եվ ՀՀ ագրոարդյունաբերական համակարգի աշխատողների արհեստակցական կազմակերպությունների ճյուղային հանրապետական միությունը հուշագիր են ստորագրել

 ՀՀ գյուղատնտեսության նախարար Իգնատի Առաքելյանը և ՀՀ ագրոարդյունաբերական համակարգի աշխատողների արհեստակցական կազմակերպությունների ճյուղային հանրապետական միության նախագահ Հասմիկ Ջհանգիրյանն այսօր ստորագրել են սոցիալական գործընկերության հուշագիր: 

 Հուշագրի նպատակն է հաստատել երկարաժամկետ և փոխշահավետ համագործակցություն մի շարք առանցքային ուղղություններով, նպաստել ոլորտի աշխատողների բարեկեցության բարձրացմանը, պաշտպանել նրանց աշխատանքային և սոցիալ-տնտեսական իրավունքներն ու շահերը, ինչպես նաև աջակցել գյուղատնտեսական մթերքների արտադրության զարգացման և շուկաների ձևավորման խնդիրների լուծմանը:

 

 «Մեր նպատակն է այս հուշագրով ստեղծել մի հարթակ, որի միջոցով գյուղացիական տնտեսությունները կկարողանանան դիմել և ստանալ իրավաբանական աջակցություն: Հուսով եմ, այն կնպաստի գյուղացիների սոցիալ-տնտեսական կյանքի բարելավմանը և իրավական դաշտում նրանց իրավունքների պաշտպանությանն ու խնդիրների լուծմանը», – նշել է նախարար Իգնատի Առաքելյանը:

 

 Նախարարն իր խոսքում ընդգծել է Ագրոարհմիության հետ հաջողված համագործակցությունը փոքր ջերմոցային տնտեսությունների ոլորտում: 
 Հասմիկ Ջհանգիրյանն իր հերթին վտահություն է հայտնել, որ գյուղացիներին հուզող խնդիրների լուծումն առավել նպատակահարմար է իրականացնել սոցիալական գործընկերության շրջանակներում:

 

 «Մենք շատ ենք կարևորում սույն հուշագրի ստորագրումը, քանի որ կարծում ենք, որ երկու կողմերի փոխհամաձայնեցված աշխատանքներն ավելի արդյունավետ կլինեն: Երկար տարիներ աշխատելով գյուղացիական ոլորտի ներկայացուցիչների հետ` մենք եկանք այն եզրակացության, որ ՀՀ գյուղատնտեսության նախարարության և Ագրոարհմիության միջև համագործակցության անհրաժեշտությունն արդեն հասունացել էր», – հավելել է Հասմիկ Ջհանգիրյանը:

 

 Հուշագրի շրջանակում նախատեսվում է կազմակերպել նաև համատեղ խորհրդակցություններ, սեմինարներ, վերապատրաստումներ, ժողովներ՝ ուղղված ոլորտի աշխատողների շահերի ներկայացմանը և պաշտպանությանը, համագործակցել համապատասխան միջազգային կազմակերպությունների, արհմիութենական միությունների, հիմնադրամների հետ և այլն:

ՀՀ ԳՆ-ում լոլիկի իրացմանն առնչվող հարցերի քննարկում

ՀՀ գյուղատնտեսության նախարարությունում քննարկվել են լոլիկի իրացմանն առնչվող հարցեր

  ՀՀ գյուղատնտեսության նախարար Իգնատի Առաքելյանը նախօրեին հրավիրել էր խորհրդակցություն, որին մասնակցում էին  Հայաստանի ջերմատնային ասոցիացիայի նախագահ Պողոս Գևորգյանը,  ՀՀ ագրոարդյունաբերական համակարգի աշխատողների արհեստակցական կազմակերպությունների ճյուղային հանրապետական միության նախագահ  Հասմիկ Ջհանգիրյանը, ՀՀ ԳՆ սննդամթերքի անվտանգության պետական ծառայության պետ Իշխան Կարապետյանը և ՍԱՊԾ պետի տեղակալ Հովհաննես Հայրապետյանը:

  Խորհրդակցության մասնակիցները քննարկել են  լոլիկի իրացմանն առնչվող հարցեր:

 

  Պողոս Գևորգյանի խոսքով՝  այսօր հանրապետությունում իրացվում է նաև Թուրքիայից ներկրված լոլիկ և վարունգ, որի մասին իրենք ահազանգել են ՀՀ գյուղատնտեսության նախարարին: Ըստ Գևորգյանի՝ նախարարություն  դիմելուց հետո ներկրումները դադարել են,  մայրաքաղաքի Մալաթիայի գյուղմթերքների շուկայում ներկրված  լոլիկ այլևս չկա,   առկա է պահեստավորված լոլիկ և վարունգ, որը պարբերաբար որոշակի քանակներով շուկայահանվում է:

 

  Նախարար Առաքելյանը նշել է, որ ահազանգը ստանալուց հետո խնդիրը  մշտապես գտնվել է պատկան մարմիների  ուշադրության կենտրոնում, սակայն հարցին արմատական լուծումներ տալու համար միայն պետական մարմինների աշխատանքը բավարար չէ,  և շատ կարևոր է հասարակական կազմակերպությունների ակտիվ մասնակցությունը: 

 

  ՍԱՊԾ պետ Իշխան Կարապետյանն առաջարկել է ստեղծել քաղաքացիական նախաձեռնության խումբ ասոցիացիայի անդամներից և գրավոր դիմում ներկայացնել, ինչն էլ հիմք կհանդիսանա ՀՀ ԿԱ պետական եկամուտների կոմիտե դիմելու և տվյալ տնտեսավարող սուբյեկտի մոտ ստուգումներ իրականացնելու համար: 

 

  Նախարարը հավելել է, որ ՀՀ ագրոարդյունաբերական համակարգի աշխատողների արհեստակցական կազմակերպությունների ճյուղային հանրապետական միությունն աջակցություն կցուցաբերի ջերմոցատերերին այդ հարցում:

 

  «Եթե ցանկանում եք, որ խնդիրը հիմնովին լուծվի, պետք է ներդրում ունենաք այդ գործընթացի մեջ: Անհրաժեշտ է դիտարկել նաև հարցի տնտեսական կողմը և  լուրջ ուշադրություն դարձնել տեղական արտադրանքի մրցունակության բարձրացման հարցին,  որպեսզի ներկրվող գյուղմթերքի նկատմամբ տեղականը չհայտնվի ոչ շահեկան վիճակում: Միգուցե նախընտրելի է դիվերսիֆիկացնել արտադրանքի տեսականին: Ներկայացրեք առաջարկներ, մենք մշտապես պատրաստ ենք և բաց ցանկացած ձևաչափով քննարկումների համար»,-նշել է նախարար Առաքելյանը:

 

  Հանդիպման ավարտին ՍԱՊԾ պետ Իշխան Կարապետյանը նաև դիմել է Հայաստանի ջերմատնային ասոցիացիայի նախագահին՝ կոչով հանդես գալ ջերմոցատերերին հորդորելու գյուղմթերքի նկատմամբ պահանջարկի աճին զուգահեռ խստիվ ուշադրություն դարձնել արտադրվող ջերմոցային արտադրանքի որակին և չչարաշահել թունաքիմիկատները:

2016 Ագրո նկարներ

2016 Ագրո նկարները կարող եք դիտել այստեղ

Տեղի է ունեցել ՀՀ գյուղատնտեսության նախարարին կից հասարակական խորհրդի հերթական նիստը

Տեղի է ունեցել ՀՀ գյուղատնտեսության նախարարին կից հասարակական խորհրդի հերթական նիստը

   ՀՀ գյուղատնտեսության նախարարությունում տեղի է ունեցել ՀՀ գյուղատնտեսության նախարարին կից հասարակական խորհրդի հերթական նիստը, որը վարում էր ՀՀ գյուղատնտեսության նախարար, խորհրդի նախագահ Իգնատի Առաքելյանը:

   Նիստի օրակարգը ձևավորվել էր խորհրդի անդամների ներկայացրած առաջարկությունների հիման վրա, որում ընդգրկվել են  ՀՀ-ում կոոպերատիվների  զարգացման ծրագրի մշակման, օրգանական շուկայի խնդիրներին ու  հնարավորություններին վերաբերող հարցեր:

   Նախարարն ընդգծել է, որ գյուղատնտեսության ոլորտում նոր  ծրագրերի մշակման և իրականացման գործում հարկավոր է ներգրավվել նաև մասնավոր հատվածին, քանի որ միայն պետական ներդրումները բավարար չեն ոլորտի բազմակողմանի զարգացման համար:

 

   Այնուհետև ՀՀ  գյուղատնտեսության նախարարին կից հասարակական խորհրդի անդամ, ՀԱԱՀ «Ագրոբիզնես և շուկայաբանություն» ֆակուլտետի դեկան Հրաչիկ  Ջավադյանն իր զեկույցում առաջարկություններ է ներկայացրել ՀՀ-ում կոոպերատիվների  զարգացման ծրագրի մշակման վերաբերյալ:  Պարոն Ջավադյանը մասնավորապես նշել է, որ կոոպերացումը շարունակական և տնտեսական կարևոր  գործընթաց է, որի կայունության ապահովմանն ու  աջակցությանը ներկայումս ուղղված է  պետության նպատակային   քաղաքականությունը, որի արդյունավետությունը  պայմանավորված կլինի գյուղատնտեսական կոոպերատիվների զարգացման ծրագրի հիմնավորված մշակմամբ ու հետևողական  իրականացմամբ:      Զեկուցողը հանդես է եկել ծրագրի մշակման վերաբերյալ մի շարք առաջարկներով, այդ թվում՝  բազմակողմանի վերլուծություն իրականացնել կազմակերպված կոոպերատիվների և նոր կոոպերատիվների կազմակերպման նպատակահարմարության վերաբերյալ, յուրաքանչյուր մարզի մասնագիտացմանը համապատասխան ընտրել և պետական  աջակցությամբ  ստեղծել 2 կոոպերատիվներ՝ դրանք դարձնելով ցուցադրական  կենտրոններ, դոնոր կազմակերպությունների միջոցով տրամադրվող միջոցներն (դրամաշնորհները) առաջնահերթ ուղղվել կոոպերատիվների ձևավորմանն ու զարգացմանը,  գյուղատնտեսական արտադրանքի իրացման ներքին շեմի քվոտաների սահմանման, պետական երաշխավորված պատվերների տրամադրման, պայմանագրային հարաբերություններում պարտականությունների և պատասխանատվության դրույթների հստակեցման միջոցով նպաստել վստահության ուժեղացմանը և գյուղատնտեսական կոոպերատիվների շահագրգռվածության բարձրացմանը և այլն:

 

   Ի հավելումն վերը նշվածի, նախարար Իգնատի Առաքելյանն իր հերթին Հայաստանում կոոպերացիայի զարգացման հարցում կարևորել է խնդրի դիտարկումը արտադրությունից մինչև իրացում արժեշղթայի մեջ` շեշտելով, որ միայն ամբողջական արժեշղթայի առկայության դեպքում կոոպերացիայի ոլորտում կարելի է հասնել շոշափելի արդյունքների:  

 

   Լսելով և քննարկելով հնչեցված հարցերը`  օրակարգի առաջին հարցի մասով որոշում է կայացվել  ՀՀ գյուղատնտեսության նախարարություն գրավոր առաջարկություններ ներկայացնել «Գյուղատնտեսական կոոպերատիվների մասին» ՀՀ օրենքում փոփոխություններ կատարելու մասին, ինչպես նաև հավանություն տալ խորհրդի անդամ Արշալույս Թարվերդյանի առաջարկին` ՀՀ-ում կոոպերացիայի զարգացման խնդիրների շուրջ Հայաստանի ազգային ագրարային համալսարանում խորհրդի շահագրգիռ անդամների և գյուղացիական տնտեսությունների մասնակցությամբ  լայնածավալ  քննարկում կազմակերպելու վերաբերյալ:   

 

   Օրակարգում ընդգրկված հաջորդ հարցը վերաբերում էր ՀՀ-ում օրգանական շուկայի ներկա իրավիճակին, խնդիրներին ու հնարավորություններին, որոնց շուրջ զեկույցով հանդես է եկել «Էկո Գլոբ» ՀԿ նախագահ Նունե Դարբինյանը: Տիկին Դարբինյանը մասնավորապես նշել է, որ  Հայաստանում արտադրվող օրգանական գյուղմթերքը մրցակցային է արտերկրի շուկայում, ունի արտահանման լայն հնարավորություններ, սակայն այսօր ծավալները շատ փոքր են, առաջարկը հետ է մնում պահանջարկից, ոլորտը զարգանում է ինքնաբուխ կերպով, որտեղ հիմնական շոգեքարշները մասնավոր ընկերություններն են` օրգանական գյուղատնտեսության ընդլայնման հարցում կարևորելով պետական և մասնավոր հատվածների  սերտ համագործակցության հարցը: Զեկուցողը  անդրադարձել է նաև սպառողների շահերի պաշտպանության խնդիրներին, ինչպես նաև հանդես է եկել մի շարք առաջարկություններով: Մասնավորապես առաջարկվել է մշակել Օրգանական գյուղատնտեսության ազգային պլան՝ ճյուղի զարգացման քաղաքականության համակարգված կիրարկումն ապահովելու համար, անցկացնել մարքետինգային ուսումնասիրություններ հայկական օրգանական ապրանքները արտահանելու ուղղությամբ, վերանայել ազգային օրգանական օրենսդրությունը և այլն:  

ԳՅՈՒՂԱՏՆՏԵՍՈՒԹՅԱՆ ԱՇԽԱՏՈՂԻ ՕՐ

ԳՅՈՒՂԱՏՆՏԵՍՈՒԹՅԱՆ ԱՇԽԱՏՈՂԻ ՕՐ

Շնորհավորում եմ գյուղատնտեսության աշխատողի օրվա առթիվ:

Յուրաքանչյուր տոն առիթ է,  որպեսզի ասենք ամենաջերմ խոսքերը այն մարդկանց, որոնք կերակրում են մեզ,  ապահովում  հացով, մսով, կաթով, մրգերով և բանջարեղենով:

Ձեր և մյուսների աշխատանքից է կախված ոչ միայն յուրաքանչյուր  ընտանիքի,  այլ նաև ամբողջ երկրի սննդամթերքի անվտանգությունը: Մեր ոլորտի աշխատողներնանում են գրեթե անհնարինը: Բնությունը ամեն տարի գյուղոլորտի աշխատողներին նոր դժվարություններ է բերում, բայց շնորհիվ նրանց նվիրվածության, քրտնաջան և լարված աշխատանքի՝ այսօր գյուղատնտեսությունը ձգտում է լինել առաջատար ոլորտ, պահպանել կայուն զարգացում և տնտեսական աճ:

Կրկին շնորհավորում եմ և մաղթում նորանոր ձեռքբերումներ ուհաջողություններ:

 

ՃՀՄ ՆԱԽԱԳԱՀ՝                      ՀԱՍՄԻԿ  ՋՀԱՆԳԻՐՅԱՆ

Հանդիպում –Սեմինար հոկտեմբերի 14-ին

Հանդիպում –Սեմինար

Հոկտեմբերի 14-ին Գյուղատնտեսի օրվան ընդառաջ  Ագրոարդի համակարգի աշխատողների Մարտունու տարածքային կազմակերպությունում  անցկացվեց  սեմինար և աշխատանքային  հանդիպում տարածքային արհմիության անդամների հետ:

Հանդիպմանը ներկա էին նաև անհատ ֆերմերային տնտեսությունների ներկայացուցիչներ:

Ներկայացվեցին ՀՀ ԱՕ փոփոխությունները և հիմնական խնդիրները, որոնք ծագում են աշխատանքային հարաբերություններում, քննարկվեցին արհմիության միջոցով դրանց լուծման  մեխանիզմները:

ՃՀՄ նախագահ Հ. Ջհանգիրյանը և Մարտունու տարածքային կազմակերպության նախագահ Արմինե Մանուկյանը խոսեցին սննդամթերքի անվտանգության, օգտագործվող պարարտանյութերի և աշխարհում ընթացող տենդենցների մասին:

Ներկաների կողմից բարձրացվեցին մի շարք խնդիրներ, որոնց լուծմանը  կաջակցի  Ճյուղային Հանրապետական Միությունը` պատկան մարմիններին դիմելու միջոցով: